أوباما

سيد الموجى

شوف قد ايه كنا مابنحبوش
حاول ماتبقاش زى صاحبك بوش
واللى باقيلكم لسه من هيبة
أمريكا يا أوباما ماتلعبّوش !
****
اللعب بمصير الشعوب مكروه
والماشى فى سكك الحروب بيتوه
خد موعظة من صاحبك المعتوه
وبلاش تكون زيه بريش منفوش !
****
عمر الزعامة ما الاحتلال جابها
ولا فيه شعوب بتضّحى بترابها
ومارينزك اللايصين فى ميت جبهة
هيضيع تعبهم بكرة كله فاشوش !
****
اللغز بن لادن مأزمكم
والرعب من كوريا ملازمكم
وإيران هاتبقى جديد هزايمكم
والدنيا بصراحة مابتطقكوش !
****
من سوء فعالكم طهقت المخاليق
ومابتبانوش أبدا فى ساعة ضيق
ومافيش لكم فى الدنيا أى صديق
بغُترة أو بطاقية أو طربوش !
****
كان بوش بيتصرف كأنه إله
وبلغ عداءكم للعدالة مداه
عايزين تحاسبوا كل خلق الله
وعلى جرايمكم ما تتحاسبوش !
****
خليك فى صف الحق يا اوباما
الدنيا فيها مظلومين ياما
مابقتش أمريكا خلاص ماما
لأى حد ، عشان ماتتغشوش !
****
السُمرة فى جبينك وفى جبينى
والفقر زارك قبل ما يجينى
حاول تصحّى أصلك الكينى
الطيب اللى فى العداوة مالوش !