نار فوق علم
يا سامع ندايا.. يا صاحبي وأخويا
يا مسلم يا قبطي.. يا أمي وأبويا
بابعت سلام .. معطّر كلام
قولوها معايا لكل الأمم
دي مصر النجاه.. ونار فوق علم
بحبك بلادي دايما عمار
بحبك كما ضي نور النهار
بحبك حجارة ونهر ومنار
بحبك دفايا في ضحك وألم
بحبك تكوني حمامة سلام
وأبني في عشقك.. مودّة ووئام
وأكونلك طبيب يداوي الآلام
بحبك حبيب بقربك حلم
بحبك جوامع تعلّي الادان
تخدني في رحابها وتدّي الأمان
بحبك بلادي تكوني مكان
لآله وعماله وفكر وقلم
بحبك عروسه في ليلة زفاف
بتحلم بعشة وضمة كتاف
ونيلك كأنه الضيوف الخفاف
هيروي حياتها ويساعده الهرم
بحبك تحبي جميع من يحبك
وترشق سهامك في عين ما يسبك
تكونى سلامه تزيدي في سربك
وتبقي ندامه في عين التلم
بحبك فريقي ولازم يفوز
يعيد الكرامه ويمحي النفوز
دا عمر الحياه.. ماهيش بالحظوظ
وعمر الكرامه ما تجني ندم
أدي أحمر بيشهد بدمّه علينا
وأبيض بيطهر ثياب المدينة
وأسود يعتم علي اللي يعادينا
ونسرك يختّم قصة علم
بحبك عزيمة في ايد من حديد
تقوي السواعد بكل الجديد
بحبك يا مصر و ليكي مريد
حروفك في روحي وحافظها صم
قولوها معايا لكل الامم
دي مصر النجاه.. ونار فوق علم
رد مع اقتباس
المشاركة الأصلية كتبت بواسطة فتحى نجم
