ارحل وجودك بينا عار
إرحل وجودك بينّا عار
...........
....
لحظة سقوطك من سما كِبرَكْ
لسابع أرض ....
( إنطق بالشهاده )
واعرف بإنّك مش مخلََّدْ في الحياهْ
وانّ التاريخ مش بسّ جاهْ
وانّ انت عبد .. وإنّ لله العبادهْ
إحفظ ولو خيط .. للوفاءْ
واقتل جموح الكبرياءْ
وارضخ يجوز لو يتقلبْ
موت الوطن .. طلقة ولادهْ
الأرض رافضه انّك تكون فيها الملكْ
وانّك تطوّح أهلها ...
على طول لسان الزمّبلكْ
دمعتها سالت فوق خدود كلّ الطرق
حلفت .. لتعمل لك إبادهْ
خلّيك صريح ..
وابني لكرامتك – لو صحيح عندك كرامهْ -
ميت ضريحْ
ترسم على جبين الشجن .. بسمة سعادهْ
وبلاش توزّع في القلوب سمّ العفنْ
د الكل خارج منها متغطّّي بكفنْ
وكفايه ضهر العمر أنّ ...
عشان مفيش غيرك ركبْ
وكفايه سيل الدمّ أصبح للرُكبْ
حاول .. تبكّي بالندم حبّة عنيك
دوّنت إسمك .. وبإديك
أول صفوف المُجرمينْ ..
ف جبين سجلّات الزمنْ
كفاياكْ دمارْ
وارحل بعار تلاتين سنه ...
قبل انهيارْ بُرج الوطنْ
قلبك دا أصبح مُرتهن للّانكسارْ
شرّبت نار الأرض – غصباً - .. دمّنا
والدمّ عمره ما يطْفِي نارْ
فكّ الحصارْ
واعرف بإن الويل .. جَبَلْ
واعرف بإن الليل .. حَبَلْ
والخِلفه هتكون النهارْ
مصر العزيزه عمرها ما تطاطي راسْ
ولا عمرها .. تقبل يكون خدّ ابنها للزيف مداسْ
حُكمك دا لعنه علينا حلّت م الأساسْ
فارحل .. وجودك بينّا عارْ
كلّ البشرْ .. والطير على غصن الشجرْ
والرمله والنيل والحجرْ
فاضت .. قلوبهم م الضّجرْ .. والّانتظارْ
دمّ الشهيد صرّخ وقالّك : عنّا غور
عبّيت عيونّا بعتمتك
خلّيها تلمح يوم ف آخر رحلتك
لو طرف نورْ
جهّز لآخر يوم كفنْ
وادبح غرورك فَدْو لعيون الوطنْ
وبلاش تكون ..
حتّى ف رحيلك ديكتاتورْ
حاكم سليط ...
والحكم مش بالبلّطجه ولا بالدراع
وسفينة الظلم اللي ماشيه ف دمّنا من غير شراع
غرقت عشان شمس الأمل من صبرها بعتت شعاع
ماتت أباطيلك خلاص ...
فالحقها حالاً .. بانتحارْ
م انا قلتلك .. الويل جَبَلْ
والليل حََبَلْ ..
والخلفه هتكون النهارْ ؟؟؟
إرحل .. وجودك بينّا عارْ
إرحل .. وجودك بينّا عارْ
.............
....
ارتجالية فوق الروعة
لشقيقى وأخى الغالى
الفنان الجميل / أحمد موسى
نقلتها هنا لعدم حرمان اخوتى واخواتى الافاضل اعضاء المنتدى
من رؤية ابداعها .
رد مع اقتباس
