البارحة ذَبّلت بقلبي رياحين ضَمّيْت على فرقاك يوم انتحيتي
خلا اليباس أورقها تبكي اللين قسى عليها الوقت يومك قسيتي
أتذكرك بخطاك وأنتي تهادين كن السحاب يسابقك لا مشيتي
ويميل مع خصرك رقيق الفساتين أذا وقفتي مال وألا انثنيتي
خصرٍ نحيل ٍ لمّته قبضة يدين لولا الضلوع أن كان قلت اختفيتي
في عاتقك يقصر طويل النجادين ويضفي جديلك للدروب إن سريتي
وفي محجر عيونك نهار وسوادين الليل وهموم الغرام إن جفيتي
ويسيل في قلبي من الحب نهرين الشوق والذكرى إذا لي طريتي
ويطير لك لــ ابتسمت العين للعين كل الفراش اللي بصدري وبيتي
يا أجمل من أعذار الخطأ للمحبين وارق نسمات الحديث إن حكيتي
تدرين ليه أنتي بقلي إلى الحين وليه بخيالي باقية ما انمحيتي
لأنك عرفتي بطيبتك كيف تبدين ولأنك رحلتي بطيب يوم انتهيتي
يا أحلى سنين العمر وأغلى العناوين يا نور مصباحي ومشكاة زيتي
أتذكرك والناس ماهم بدارين وأتذكرك لا قلت ليتي وليتي
جيتي أو انه غيبك نازح البين منساك أنا يا بعد حيي وميتي