سكران حب
.........
...
بحبك يللي من حسنك تغير الحور
وبكتب شعر لعيونك بخيط من نور
وبكتب بالدهب وصفك
وكلّ الشعر مش واصفك
لكن يا حبيبتي بحلف لك
لهجعل كل أشعاري
تخلّي السحر من شعري
يكون مبهور
.....
عيونك لؤلؤه شايله
معاني السحر ف النني
عيونك جنّه والجنّه
نسيمها بمسك متحنّي
وشَعرك نيل بدون ضفه
جبينك طفل في اللفه
قصاده الشمس تتخفّى
وتصبح بور
.....
وعشقك شيء محيرني
أسافر بيه لبره الكون
ياخدني بشوقي ويجبني
لا انا عاقل ولا مجنون
أسلِّم ع الشجر بالإيد
وأكتب ع الورق إسمك
وأفرد ع الطريق تنهيد
ماهو مرِّت عليه قدمك
تشوفني صحابي تستغرب
تقرَّب مني وتطبطب
وناس بتشوفني تتهرَّب
يقولوا م الهوى مسحور
.....
وانا وعنيكي قدامي
بشوفها كالسما واصفى
عيون الحور على بابهم
ف كفه وتبقي في كفه
أشوف فيهم شطوط عشقي
ومرسى الحب واللهفه
ماهيا لوحدها صنعت
من القلب الحجر شاعر
وخلَّت نبض إحساسه
ف قلب بحورها بيسافر
وموج العشق بيشيله
ويتمايل مع ميله
ونسمة حب بتجيله
وتتمنى يجيلها الدور
.....
ويسكر قلبي من شفه
كما الجمره وسنان فيروز
وخمرة عطر بنضارة
زهور اللوز
واشوف الورد فوق خدِّك
ربيع مصنوع على قدِّك
دنا قلبي الملك عبدك
بشوقه يفوت جبال وبحور
.....
دنا قلبي النهار عندك
وليل عمري ف جزيرة شوق
منايا أدق باب قلبك
فيفتح لي وياخدني لفوق
لأبعد نجمه ف عنينا
نعيش انا وانتي وحدينا
طيور الحب حوالينا
بتحمينا وتبني السور
.....
د حسنك ف الوجود آيه
وإسمك غنوه ف لساني
منايا تكوني ويايا
وقلبك يبقى عنواني
نهاري تكوني شمسايه
وليلي تكوني قمرايه
أنام وتنامي جوايا
ونصحى بزقزقات عصفور
...........
.....
..
بقلم / أحمد سعيد موسى
رد مع اقتباس