منيش شاعر بَرُصّ حروف
منيش شاعر ولا عمري كنت شاعر بَرُصّ حروف
مفيش معنى هايوصلكوا منيش عازف ولا معزوف
منيش شاعر ولا بكتب ، ولا عايش في هم وخوف
واخاف اترجم إحساسي ومنيش متعلق بأي ظروف
منيش شاعر وفي دموعي أنا مسافر وبيها هاطوف
بدون بحر ولا بوزن كلمتي مرة تحت أي ظروف
انا الكلمة بتسرقني منيش بسرق تعب غيري وغيري ألوف
بدنيا الشعر لو تعرف ليه عايشين شمال بيها وهما ضيوف
وراضية ضميري ومهيش فارقة يا حرفي تكون مكسوف
و بكتب كلمة من قلبي ولا بسمع ولا حتى بشوف
ضنايا الحرف لو ميت مهوش واصف ولا موصوف
تمللي قلبي بيندهني وانا الإحساس وبيه معروف
منيش شاعر واوعى تصدقني كلامي دا حبة تخاريف
في الفضا تايه ملوش لازمة ولا عمره هايحارب زيف
ومهوش عسكر ولا واقف على حدودكو بأي صفوف
ربيع حرفي ميخضرش ولا يمطر ف شتاه وخريف
وانا المنفي عن أرضي وانا المتسمر ف عز الصيف
بقلم / وفاء محمود كحيل
‏الثلاثاء‏، 12‏ أيار‏، 2009