كلمات أوبريت
ارفع راسك فوق
*********



انهض وارفع راسك فوق
واصرخ قول انا ليا حقوق
مش هاتنازل أبداً عنها
وهاخدها كاملة وبالذوق
***
انهض وارفع راسك فوق
***
ارفع راسك فوق واتمنى
وازرع أحلامك في ميدانا
وطنك يبقى بحلمك جنة
بمحبة وإخلاص وهدوء
***
انهض وارفع راسك فوق
***
ارفع راسك قول انا مصري
وبإصراري هالوّن عصري
والعالم يشهد على نصري
وهارجّع حقي المسروق
***
انهض وارفع راسك فوق
***
ارفع راسك فوق الهمّ
وارسم نكتة وغني يا عم
ثورة عظيمة وخفة دم
شوف حلاوتنا المصري ودوق
***
انهض وارفع راسك فوق
***
ارفع راسك قول ثوّار
مش تافهين ولا ثورة هزار
احنا شباب مصر الأحرار
من طين الإصرار مخلوق
***
انهض وارفع راسك فوق
***
ارفع راسك وسط الهوجة
واعدل راس سياستنا العوجة
وان غيرك قام ركب الموجة
قول له انزل يا أخينا وفوق
***
انهض وارفع راسك فوق
***
ارفع راسك بص لبكرة
حب تحب.. وإكره تكره
حط ف حلمك مليون فكرة
يكمل زي صلاة ووضوء
***
انهض وارفع راسك فوق
***
ارفع راسك فوق يا زميلي
ما تقولش دا جيلك ودا جيلي
مصرك مصري ونيلك نيلي
وما فيش بيننا أي فروق
***
انهض وارفع راسك فوق
***
ارفع راسك خطط وابني
وارسم بكرة لإبنك وابني
ع الغلطة هاحاسبك وحاسبني
والغلطان مننا محقوق
***
انهض وارفع راسك فوق
***
ارفع راسك واوعى تطاطي
لا لشومة ولا رصاص مطاطي
عشت سنين كان صوتك واطي
وبنار الطغيان محروق
***
انهض وارفع راسك فوق
***
ارفع راسك فوق في العالي
واوعى تقول للظلم انا مالي
دمّ الشهدا اخواتك غالي
ليه بس تخاف من مخلوق؟
***
انهض وارفع راسك فوق
***
ارفع راسك وارفع إيدك
وارفع علمك.. غني نشيدك
واصنع من أحزانك عيدك
الدنيا هتحلى وهتروق
***
انهض وارفع راسك فوق
اصرخ قول انا ليا حقوق
مش هاتنازل أبداً عنها
وهاخدها كاملة وبالذوق
***
انهض وارفع راسك فوق
***
مصطفى الجزار