((فاهمين غلط)).. شعر/ مصطفى الجزار
فاهمين غلط
*********
آه يا شِلّة مفترية وبلطجية وسفّاحين
يا اللي حاكمين ع البلد دي تنظلم طول السنين
يا اللي حاكمين البلد دي بالطبنجة ونجمتين
يا اللي فاكرين مصر تورتة
انت خَرْطة وهوا.. خَرْطة
واما اقولّك: مين سيادَتك؟
فجأة تتبعتر كرامتي..
فاعرف ان الباشا.. شُرطة!
شُرطة ايه اللي تخلي شعبنا..
يكره بلادُه؟
شُرطة ايه اللي تهين الأبّ وتعذّب وِلادُه؟
شرطة ايه اللي تقولَّك:
إحنا أسياد العبيد
واللي ما يبوسشي إيدينا..
اعتقال.. أو قطع إيد
؟
يا سيادَتك.. يا جنابَك
افتكر ساعة حسابك
مش حساب الآخرة بَس
لأ وبرضُه حسابي ليك
مش هترعبني النجوم المفتريّة فوق كِتافَك
مش هاخافَك
النجوم دي عَقد بيني وبين ضميرَك
لو تصونُه.. يبقى كتَّر ألف خيرَك
لو تخونُه..
يبقى ما تلومنيش إذا قررت انحّيك من حمايتي..
واني اكلِّف حدّ غيرَك
...
يا سيادَتك
نفسي مَرة تفهموا دوركو الحقيقي
تفهم اني مش عدوَّك
وانّ من حقّي عليك..
إني احسّ انك شقيقي
يا رجال الأمن..
نفسي أحس بالأمن اما اشوفكم
مش مجرد إني اعدّي ع الكمين.. يلبسني خوفكم
بابقى عارف إني مش مشبوه..
ولا فوق راسي بطحة
وان كل مواقفي.. واضحة
بس عيني لما شافت..
-يا جنابَك-
رشوة بتزيِّن وَجاهتَك..
الوطن شَكّ ف نزاهتَك
الوطن شَكّ ف أمانة كل واحد قال آمين
واما شاف الخط واصل م اللوا لحدّ الـ... أمين!
باقي مين؟؟
يا رجال الأمن..
عارف..
إنكم..
مش كلّكم فاهمين غلط
بعضكم إنسان حقيقي..
بس مُعظمكم........ نُقَط!
والكرامة..
عمرها ما بتقبل الحل الوسط
...
اللي فات.. مؤلم أكيد
بس هنسيبُه يعدّي
واللي جاي..
مشهد جديد
فافهموا معنى البلد دي
افهموا..
إيه معنى مصر
********
مصطفى الجزار
6/3/2011
رد مع اقتباس
المشاركة الأصلية كتبت بواسطة مصطفى الجزار
